Sefydlwyd Afonwen ym 1935 fel yr Afonwen Steam Laundry Limited gan y teulu Owen. O'r cychwyn cyntaf, bu Afonwen yn fusnes teuluol gyda'r nod o ddarparu gwasanaeth personol i'w gwsmeriaid. Dechreuodd y busnes gyflenwi teuluoedd lleol a thai llety bychain yn y dyddiau pan oedd teuluoedd yn heidio i Gymru i aros mewn tai llety glan môr i fwynhau gwynt y môr ac edmygu golygfeydd ysblennydd Gogledd Cymru.

Pan sefydlwyd Afonwen dechreuodd trwy wasanaethu teuluoedd lleol a oedd yn dibynnu ar y golchdy lleol i ddarparu gwasanaeth golchi personol i'w defnydd yn y cartref cyn dyfodiad y peiriant golchi modern. Ehangodd y busnes yn raddol y tu hwnt i gymunedau Llyn i wasanaethu trefi cyfagos y Gogledd, gan gynnwys Caernarfon, Bangor a Betws-y-coed.

Ym 1976, prynwyd Afonwen gan y teulu Woolfenden sydd wedi rhedeg y busnes ers hynny. Ar ôl iddynt brynu'r busnes, dechreuodd Afonwen ddiweddaru ei beiriannau golchi a chanolbwyntio ymdrechion ar logi llieiniau, cyflenwi llieiniau a darparu gwasanaethau golchi i'r diwydiant twristiaeth yn bennaf ledled y Gogledd, gan ei alluogi i ehangu ei wasanaeth i gynnwys canolfannau twristiaeth bwysig Ynys Môn a Llandudno, â'r ardaloedd cyfagos.

Erbyn 1981, roedd gan Afonwen bresenoldeb amlwg yn niwydiant Gwestai Gogledd Cymru a symudodd gyda'r oes gan roi'r gorau i ddarparu gwasanaeth golchi i gwsmeriaid preifat, gan fod cynifer ohonynt bellach yn golchi eu dillad eu hunain gartref yn sgil dyfodiad peiriannau golchi dillad cartref da a rhad.

Roedd hyn yn galluogi Afonwen i ganolbwyntio ar ehangu ei fusnes llogi llieiniau ymhellach lle oedd gofyn am lefelau uwch o adnoddau cynhyrchu er mwyn ateb y galw. Mae hyn wedi annog Afonwen i fuddsoddi ymhellach ac ymestyn ei diriogaeth i Loegr yn ogystal ag ehangu ei wasanaeth ledled y Canolbarth i chwilio am gwsmeriaid newydd.

Ym 1986, daeth Afonwen yn rhan o fasnachfraint Brooks Service Group plc, a oedd ar y pryd yn un o'r prif gwmnïau llogi llieiniau cenedlaethol a bu'n cydweithio'n agos â Brooks i ddatblygu ei gwsmeriaid, gan sicrhau contractau gyda Gwestai ledled y wlad sydd wedi caniatáu i'r ddau fusnes dyfu a newidiwyd enw'r Afonwen Steam Laundry Company i Afonwen Services Limited.

Wrth i Afonwen barhau i ehangu, cymerwyd y penderfyniad i symud o'r cyfleuster cynhyrchu gwreiddiol y sefydlwyd y busnes ynddo, ar y brif ffordd rhwng Pwllheli a Chricieth, i gyfleuster cynhyrchu newydd i alluogi'r busnes i barhau i dyfu.

Gorffennwyd y gwaith adeiladu ar y safle erbyn Mai 1999 a symudodd Afonwen ei holl waith dros benwythnos gwyl y banc, gan sicrhau bod ei wasanaeth yn parhau'n ddi-dor ar hyd yr amser. Ers iddo symud, bu twf Afonwen yn fwy dramatig fyth, gan ddyblu faint o waith y gall ei brosesu o fewn pum mlynedd ac mae ansawdd ei wasanaeth wedi parhau i gryfhau, wrth i'r busnes dyfu.

Y n 2007 sefydlodd Cyfarwyddwyr Afonwen, Whiteriver Laundry, ein chwaer olchdy, yn ymdrin â Sir Efrog; a dechreuont weithio ar gynllun i agor golchdy mawr masnachol yn Ne Cymru i ateb gofynion ardal oedd, yn hanesyddol, wedi ei wasanaethu'n wael gan y diwydiant golchdai.

Yng ngwanwyn 2008, cyhoeddwyd rhaglen buddsoddiad anferth o £5 miliwn gyda chefnogaeth Cynulliad Cenedlaethol Cymru. Mae ein cyfleuster cynhyrchu newydd, o'r raddfa flaenaf, yn agor yr haf yma, yn galluogi cryn gynnydd yn ein gallu cynhyrchu a chyrhaeddiad ein gwasanaeth.

Mae gan sylfaenwyr gwreiddiol y busnes a'r holl staff sydd wedi gweithio gydag Afonwen dros y blynyddoedd lawer i ymfalchïo ynddo wrth iddynt drawsnewid golchdy bach lleol, a fu'n gwasanaethu'r gymuned leol, i fod yn un o'r prif gwmnïau llogi llieiniau yn y Deyrnas Unedig.